Vishnu

ବରାହସ୍ତୋତ୍ରମ୍~ Varaha stotram in odia

Last Updated on April 21, 2021 

Read Varaha stotram in odia with lyrics(save as pdf) ବରାହସ୍ତୋତ୍ରମ୍:

ଶ୍ରୀ ଗଣେଶାୟ ନମଃ

ଋଷୟ ଊଚୁଃ –

ଜିତଂ ଜିତଂ ତେଽଜିତ ଯଜ୍ଞଭାବନା ତ୍ରୟୀଂ ତନୁଂ ସ୍ୱାଂ ପରିଧୁନ୍ୱତେ ନମଃ ।
ଯଦ୍ରୋମଗର୍ତେଷୁ ନିଲିଲ୍ୟୁରଧ୍ୱରାସ୍ତସ୍ମୈ ନମଃ କାରଣସୂକରାୟ ତେ ॥ ୧॥

ରୂପଂ ତବୈତନ୍ନନୁ ଦୁଷ୍କୃତାତ୍ମନାଂ ଦୁର୍ଦର୍ଶନଂ ଦେବ ଯଦଧ୍ୱରାତ୍ମକମ୍ ।
ଛନ୍ଦାଂସି ଯସ୍ୟ ତ୍ୱଚି ବର୍ହିରୋମସ୍ୱାଜ୍ୟଂ ଦୃଶି ତ୍ୱଙ୍ଘ୍ରିଷୁ ଚାତୁର୍ହୋତ୍ରମ୍ ॥ ୨॥

ସ୍ରୁକ୍ତୁଣ୍ଡ ଆସୀତ୍ସ୍ରୁବ ଈଶ ନାସୟୋରିଡୋଦରେ ଚମସାଃ କର୍ଣରନ୍ଧ୍ରେ ।
ପ୍ରାଶିତ୍ରମାସ୍ୟେ ଗ୍ରସନେ ଗ୍ରହାସ୍ତୁ ତେ ଯଚ୍ଚର୍ୱଣଂ ତେ ଭଗବନ୍ନଗ୍ନିହୋତ୍ରମ୍ ॥ ୩॥

ଦୀକ୍ଷାନୁଜନ୍ମୋପସଦଃ ଶିରୋଧରଂ ତ୍ୱଂ ପ୍ରାୟଣୀୟୋଦୟନୀୟଦଂଷ୍ଟ୍ରଃ ।
ଜିହ୍ୱା ପ୍ରବର୍ଗ୍ୟସ୍ତବ ଶୀର୍ଷକଂ କ୍ରତୋଃ ସଭ୍ୟାବସଥ୍ୟଂ ଚିତୟୋଽସବୋ ହି ତେ ॥ ୪॥

ସୋମସ୍ତୁ ରେତଃ ସବନାନ୍ୟବସ୍ଥିତିଃ ସଂସ୍ଥାବିଭେଦାସ୍ତବ ଦେବ ଧାତବଃ ।
ସତ୍ରାଣି ସର୍ୱାଣି ଶରୀରସନ୍ଧିସ୍ତ୍ୱଂ ସର୍ୱୟଜ୍ଞକ୍ରତୁରିଷ୍ଟିବନ୍ଧନଃ ॥ ୫॥

ନମୋ ନମସ୍ତେଽଖିଲୟନ୍ତ୍ରଦେବତାଦ୍ରବ୍ୟାୟ ସର୍ୱକ୍ରତବେ କ୍ରିୟାତ୍ମନେ ।
ବୈରାଗ୍ୟଭକ୍ତ୍ୟାତ୍ମଜୟାନୁଭାବିତଜ୍ଞାନାୟ ବିଦ୍ୟାଗୁରବେ ନମୋ ନମଃ ॥ ୬॥

ଦଂଷ୍ଟ୍ରାଗ୍ରକୋଟ୍ୟା ଭଗବଂସ୍ତ୍ୱୟା ଧୃତା ବିରାଜତେ ଭୂଧର ଭୂଃ ସଭୂଧରା ।
ଯଥା ବନାନ୍ନିଃସରତୋ ଦତା ଧୃତା ମତଙ୍ଗଜେନ୍ଦ୍ରସ୍ୟ ସପତ୍ରପଦ୍ମିନୀ ॥ ୭॥

ତ୍ରୟୀମୟଂ ରୂପମିଦଂ ଚ ସୌକରଂ ଭୂମଣ୍ଡଲେନାଥ ଦତା ଧୃତେନ ତେ ।
ଚକାସ୍ତି ଶୃଙ୍ଗୋଢଘନେନ ଭୂୟସା କୁଲାଚଲେନ୍ଦ୍ରସ୍ୟ ଯଥୈବ ବିଭ୍ରମଃ ॥ ୮॥

ସଂସ୍ଥାପୟୈନାଂ ଜଗତାଂ ସତସ୍ଥୁଷାଂ ଲୋକାୟ ପତ୍ନୀମସି ମାତରଂ ପିତା ।
ବିଧେମ ଚାସ୍ୟୈ ନମସା ସହ ତ୍ୱୟା ଯସ୍ୟାଂ ସ୍ୱତେଜୋଽଗ୍ନିମିବାରଣାବଧାଃ ॥ ୯॥

କଃ ଶ୍ରଦ୍ଦଧୀତାନ୍ୟତମସ୍ତବ ପ୍ରଭୋ ରସାଂ ଗତାୟା ଭୁବ ଉଦ୍ୱିବର୍ହଣମ୍ ।
ନ ବିସ୍ମୟୋଽସୌ ତ୍ୱୟି ବିଶ୍ୱବିସ୍ମୟେ ଯୋ ମାୟଯେଦଂ ସସୃଜେଽତିବିସ୍ମୟମ୍ ॥ ୧୦॥

ବିଧୁନ୍ୱତା ବେଦମୟଂ ନିଜଂ ବପୁର୍ଜନସ୍ତପଃସତ୍ୟନିବାସିନୋ ବୟମ୍ । var ଜୟମ୍
ସଟାଶିଖୋଦ୍ଧୂତଶିବାମ୍ବୁବିନ୍ଦୁଭିର୍ୱିମୃଜ୍ୟମାନା ଭୃଶମୀଶ ପାବିତାଃ ॥ ୧୧॥

ସ ବୈ ବତ ଭ୍ରଷ୍ଟମତିସ୍ତବୈଷ ତେ ଯଃ କର୍ମଣାଂ ପାରମପାରକର୍ମଣଃ ।
ଯଦ୍ୟୋଗମାୟାଗୁଣୟୋଗମୋହିତଂ ବିଶ୍ୱଂ ସମସ୍ତଂ ଭଗବନ୍ ବିଧେହି ଶମ୍ ॥ ୧୨॥

ଇତି ଶ୍ରୀମଦ୍ଭାଗବତପୁରାଣାନ୍ତର୍ଗତଂ ବରାହସ୍ତୋତ୍ରଂ ସମ୍ପୂର୍ଣମ୍ ॥

Similar Posts

Leave a Reply

Your email address will not be published. Required fields are marked *